ഡയറി എടുത്ത് കുറിച്ചു ....
ഉറക്കം വരുന്നേയില്ല. മനസ്സിൽ വല്ലാത്ത അസ്വസ്ഥത. അത് ശരീരത്തിലേയ്ക്കും അരിച്ചു കയറുന്നു. തിരിഞ്ഞും മറിഞ്ഞും കിടന്ന് മടുത്തു. അതുകൊണ്ട് എഴുന്നേൽക്കാം എന്ന് കരുതി. സമയം പാതിരാ കഴിഞ്ഞു. .
സത്യമായും എനിയ്ക്ക് നിന്നേക്കുറിച്ച് എഴുതണമെന്നുണ്ട്. നിന്നേ ക്കുറിച്ചെഴുതുമ്പോൾ അതേറ്റവും ചുരുങ്ങിയ വാക്കുകളിൽ ആവണമെന്ന് എനിയ്ക്ക് നിർബന്ധവുമുണ്ട് . കാച്ചിക്കുറുക്കി ഏറ്റവും സ്വാദിഷ്ടമായ അവസ്ഥയിലെത്തണം വാക്കുകൾ. അത്രയേറെ തീവ്രതയും ഉണ്ടാവണം .
പണ്ടത്തേപ്പോലെ തേനും പാലും ഒഴുകുന്ന പ്രണയമർമ്മരങ്ങളൊന്നും എനിയ്ക്ക് പറ്റുകയേയില്ല. നീ എന്നും പറഞ്ഞു കളിയാക്കാറുള്ളതുപോലെ , നമ്മൾ വേറെ ലെവലാ.. അല്ലേ ? സത്യത്തിൽ, നീ കളിയാക്കുന്നതുപോലെതന്നെ , പ്രണയമർമ്മരങ്ങളിൽ നിന്നും ഒരുപാട് മുന്നോട്ട് പോയില്ലേ നമ്മൾ? ' നിനക്കെല്ലാം തമാശയാണ് ' എന്ന് നമ്മൾ പരസ്പരം പരിഭവിയ്ക്കുമ്പോഴും , നമുക്കറിയാം ആ തമാശയാണ് നമുക്ക് ചേരുന്ന ഉടുപ്പ് എന്ന്. അതിൽ നമ്മൾ നിരാശരല്ലതാനും. എന്നെക്കുറിച്ച് നിനക്കെന്തറിയാം എന്ന് നമ്മൾ രണ്ടുപേരും പരസ്പരം മനസ്സിൽ ചോദിയ്ക്കുന്നുണ്ടെങ്കിലും , പറയാതെയും അറിയാതെയും അറിയുന്ന നമുക്ക് മറ്റൊരു ഉത്തരവും ആ ചോദ്യത്തിന് വേണ്ട എന്നും നമുക്കറിയാം.
എനിയ്ക്കറിയാം നീയൊരു വടവൃക്ഷമാണെന്ന് . തളരുന്നവർക്ക് തണലും തണുപ്പും കൊടുക്കുന്ന വടവൃക്ഷം . ആ തണലും തണുപ്പും ഞാൻ എത്രയോ അനുഭവിച്ചു ! ഒരു വടവൃക്ഷത്തെ വെട്ടിയെടുത്ത് വീട്ടിൽ കൊണ്ടുപോകാം എന്ന് ചിന്തിയ്ക്കാൻ മാത്രം മണ്ടിയല്ല ഞാൻ എന്നത് നിന്റെയും കൂടി അഭിമാനമല്ലേ ? നിന്നിൽ നിന്നും കൊഴിഞ്ഞുവീഴുന്ന ഒരു ഇല പോലും ഞാനെടുത്തില്ല , എടുക്കുകയുമില്ല എന്ന് അഭിമാനത്തോടെ അവകാശപ്പെടുമ്പോഴും , എന്റെ ഇത്തിരിമുറ്റത്തെ നാട്ടുചെടികളിൽ - എന്റെമാത്രം നാട്ടുചെടികളിൽ .. എനിയ്ക്ക് മാത്രം തഴുകാനും പരിപാലിയ്ക്കാനുമുള്ള നാട്ടുചെടികളിൽ - ഒന്നായാൽ മതിയായിരുന്നു നീ എന്ന് ചിലപ്പോഴെങ്കിലും ഞാൻ ആശിച്ചിട്ടുണ്ട് എന്ന പരമരഹസ്യം ഒരിയ്ക്കലും ഞാൻ നിന്നോട് പറയാൻ പോകുന്നില്ല. അല്ല, നീ തന്നെ പറ .. അത്രയും തരം താഴാൻ പാടുണ്ടോ ഞാൻ ? ഒന്നുല്ലേലും ശ്രീബുദ്ധനെ ആരാധിയ്ക്കുന്നവരല്ലേ നമ്മൾ ? നീ പേടിയ്ക്കണ്ട .. നമ്മൾ വേറെ ലെവലാ..
ഖലീൽ ജിബ്രാനും മെയ് സിയാദും ആണ് നമ്മുടെ റോൾ മോഡലുകൾ എന്ന് നമ്മൾ പരസ്പരം പറഞ്ഞിട്ടില്ല . പക്ഷെ പറയുന്നതിലും വലുതല്ലേ ജീവിച്ചുകാണിയ്ക്കുന്നത് ? ഖലീൽ ജിബ്രാൻ , മെയ് സിയാദിനെ പ്രണയിച്ചത് കത്തുകളിലൂടെയാണെന്നും , ഒരിയ്ക്കലും അവർ പരസ്പരം കണ്ടിട്ടില്ലെന്നും, ശബ്ദം പോലും കേട്ടിട്ടില്ലെന്നും നമുക്കറിയില്ലേ ?
ഒരിയ്ക്കൽപ്പോലും കാണാതേയും കേൾക്കാതെയും പരസ്പരം സാന്നിദ്ധ്യം അറിഞ്ഞവർ ... ജീവിതാവസാനം വരെ കാണാതെ പ്രണയിച്ചു പ്രണയിച്ച് മരിച്ച അവർ തന്നെയല്ലേ നമ്മുടെ റോൾ മോഡൽ ആകേണ്ടത് ? അതെ.... ഇതൊന്നും ഒരിയ്ക്കലും നമ്മൾ തമ്മിൽ പറഞ്ഞിട്ടില്ല. കാരണം , നമ്മൾ വേറെ ലെവലല്ലേ ..
പണ്ടൊരു രാജാവ് ഒരു സന്യാസിയോട് വീമ്പ് പറഞ്ഞു , താൻ ഇത്രയിത്ര രാജ്യങ്ങൾ വെട്ടിപ്പിടിച്ചു എന്ന് . സന്യാസി പറഞ്ഞു , " അങ്ങ് എത്രയോ ദരിദ്രനാണ് ! അങ്ങയേക്കാൾ എത്രയോ ധനികനാണ് ഞാൻ !"
രാജാവ് വീണ്ടും അഹങ്കരിച്ചു... "ഒന്നുമില്ലാത്ത താങ്കൾ ധനികനാകുന്നതെങ്ങനെ ?"
സന്യാസി പറഞ്ഞു.. "ഒന്നുമില്ലാത്തവന് മുകളിൽ ആകാശം.."
ഇതൊരു പഴങ്കഥ . ആകാശം എന്ന വാക്കിന് എത്ര വിശാലമായ അർത്ഥമാണ് അല്ലെ ? ആകാശം... അനന്തമായ ആകാശം... ആരും അവകാശം പറയാനില്ലാത്ത ആകാശം.. ആരും സ്വന്തമാക്കാനും വെട്ടിപ്പിടിയ്ക്കാനും വരാത്ത ആകാശം ... അതൊരു ധന്യതയല്ലേ ? അതെ... തീർച്ചയായും സന്യാസി ധനികൻ തന്നെ.
എന്തിനാണ് ഞാനിപ്പോൾ ഈ കഥ ഓർത്തത്? അതെ... അതുതന്നെ.. നീയാണ് എന്റെ ആകാശം . നിന്നിലാണ് ഞാൻ പറന്നുനടന്നത്. നിന്നിലൂടെയാണ് ഞാൻ കാഴ്ചകൾ കണ്ടത്. മേഘങ്ങളുടെ ഇരുട്ടിനിടയിൽ നീ തന്ന ഒരുതുണ്ട് വെളുപ്പ്.. അതുമാത്രമാണ് എന്റെ കാഴ്ച .. നീയറിയാതെ , ആരുമറിയാതെ എന്റെ ഡയറിയിലെങ്കിലും എനിയ്ക്കിതൊന്ന് കുറിച്ചുവയ്ക്കണം ... നീ പേടിയ്ക്കണ്ട .. ലെവല് വിട്ട് പോവില്ല ഞാൻ...
എന്തുകൊണ്ടാണ് നിന്നെക്കുറിച്ചെഴുതാൻ എനിയ്ക്ക് വാക്കുകൾ തികയാതെ പോകുന്നത് ? നിന്നെക്കുറിച്ചെഴുതാനിരിയ്ക്കുമ്പോൾ എന്തുകൊണ്ടാണ് വാക്കുകൾ എന്നിൽനിന്നും കുതറിത്തെറിച്ച് പോകുന്നത് ? അറിയില്ല. ഈ അറിവില്ലായ്മയ്ക്ക് ഇനിയും ഞാൻ പേരിട്ടിട്ടില്ല. എങ്ങനെ പേരിടാൻ ? നമ്മുടെ ലെവൽ...
നമ്മുടെ ഈ പ്രിയപ്പെട്ട അറിവില്ലായ്മയും അർത്ഥമില്ലായ്മയും നീയറിയാതെ രഹസ്യമായിരിയ്ക്കട്ടെ.. എന്റെ ഡയറികുറിപ്പുകളിൽ ഒരു ഹൃദയത്തുടിപ്പായി...
22 അഭിപ്രായ(ങ്ങള്):
good writing
നന്ദി സജീവ്... :) സന്തോഷം.. വീണ്ടും പ്രതീക്ഷിയ്ക്കുന്നു സാന്നിദ്ധ്യം.
നിസ്വാര്ത്ഥമായ പങ്കുവയ്ക്കല് അല്ലേ ശിവേച്ചീ
അതെ തീര്ത്തും നിസ്വാര്ഥമായ പങ്കുവയ്ക്കല്. നന്ദി ദേഷ്യപ്പക്ഷീ.. :)
സ്നേഹം പ്രതിബന്ധം അറിയുന്നില്ല എന്നാണല്ലോ പറയുന്നത്.അങ്ങനെയുള്ള സ്നേഹം പ്രതിഫലം ഇശ്ചിക്കുന്നും ഇല്ല.നല്ല മനസ്സിന്റെ നല്ല പ്രതിഫലനം.അഭിനന്ദനങ്ങള്
നന്ദി.. സന്തോഷം ഫ്രാന്സിസ്.. :)
ആകാശം എന്ന വാക്കിന് എത്ര വിശാലമായ അർത്ഥമാണ് അല്ലെ ? ആകാശം... അനന്തമായ ആകാശം... ആരും അവകാശം പറയാനില്ലാത്ത ആകാശം.. ആരും സ്വന്തമാക്കാനും വെട്ടിപ്പിടിയ്ക്കാനും വരാത്ത ആകാശം .
പ്രിയ ശിവ ചുരുങ്ങിയ വാക്കുകളിലൂടെ പകർത്തിയിടുന്നത് താങ്കളുടെ ഹൃദയം തന്നെയാണ് ..അതിമനോഹരം ..ആശംസകൾ
നന്ദി സാംസണ്. സന്തോഷം. "താങ്കള്" എന്നാ വിളി നിര്ത്തിയത് അറിയിയ്ക്കാന് മുന്പ് വറോല അയച്ചുകഴിഞ്ഞു എന്നൊക്കെ പറഞ്ഞിട്ട് ? ഹ്ഹ്ഹ
Life ...!!!
.
Manoharam, Ashamsakal....!!!
നന്ദി സുരേഷ്... സന്തോഷം.. :)
ഹ..ഹ.. നിങ്ങ വേറെ ലെവലാ.. എന്താ ഭാവന.. നമിച്ചു
ഹ..ഹ.. നിങ്ങ വേറെ ലെവലാ.. എന്താ ഭാവന.. നമിച്ചു
സന്തോഷം വിജീഷ്.. നന്ദി.. :) വീണ്ടും പ്രതീക്ഷിയ്ക്കുന്നു സാന്നിദ്ധ്യം.
Gambheeramaaya bhasha. Manassil thattunna theme.. nannaayi nanda
നന്ദി..സന്തോഷം നന്ദു.. :)
എനിയ്ക്ക് മാത്രം തഴുകാനും പരിപാലിയ്ക്കാനുമുള്ള നാട്ടുചെടികളിൽ - ഒന്നായാൽ മതിയായിരുന്നു നീ എന്ന് ചിലപ്പോഴെങ്കിലും ഞാൻ ആശിച്ചിട്ടുണ്ട് എന്ന പരമരഹസ്യം ഒരിയ്ക്കലും ഞാൻ നിന്നോട് പറയാൻ പോകുന്നില്ലഎന്തുകൊണ്ടാണ് നിന്നെക്കുറിച്ചെഴുതാൻ എനിയ്ക്ക് വാക്കുകൾ തികയാതെ പോകുന്നത് ? നിന്നെക്കുറിച്ചെഴുതാനിരിയ്ക്കുമ്പോൾ എന്തുകൊണ്ടാണ് വാക്കുകൾ എന്നിൽനിന്നും കുതറിത്തെറിച്ച് പോകുന്നത് ? അറിയില്ല. ഈ അറിവില്ലായ്മയ്ക്ക് ഇനിയും ഞാൻ പേരിട്ടിട്ടില്ല.
നന്ദി നീരജ്..
'നിന്നിൽ നിന്നും കൊഴിഞ്ഞുവീഴുന്ന ഒരു ഇല പോലും ഞാനെടുത്തില്ല , എടുക്കുകയുമില്ല എന്ന് അഭിമാനത്തോടെ അവകാശപ്പെടുമ്പോഴും' - നിസ്വരായവർ ആണല്ലോ യഥാർത്ഥ ധനികർ :-)
നന്നായി ഇഷ്ടപ്പെട്ടു ശിവേച്ചീ..
നന്ദി മഹി.. കുറെ നാളായല്ലോ മഹിയെ കണ്ടിട്ട്..
കുറച്ചു ജോലിത്തിരക്കിൽ പെട്ടുപോയി ശിവേച്ചീ. ഇന്ന് കുത്തിയിരുന്ന് വായിക്കാൻ വിട്ടുപോയ എല്ലാ പോസ്റ്റുകളും വായിച്ചുതീർത്തു ;-)
പിന്നെ കിട്ടിയ സമയത്ത് ഒരു പുതിയ പോസ്റ്റ് റെഡി ആക്കുകയായിരുന്നു.. വഴിയോരകാഴ്ചകളിൽ വന്നാൽ കാണാം ;-)
വരാം മഹി .. ഉടനെ വരാം ട്ടോ..
ഒരു അഭിപ്രായം പോസ്റ്റ് ചെയ്യൂ