ചിതറിത്തെറിച്ച തുള്ളികൾ .

                                             ചിതറിത്തെറിച്ച  തുള്ളികൾ .
                                             ------------------------------------
                                                                                                  --ശിവനന്ദ .

                      സമീറയ്ക്ക്   ഭർത്താവ്  വിദേശത്തുനിന്നയച്ച  കത്തുകൾ ,  അവളെഴുതിവച്ച  മറുപടി .....എല്ലാമെല്ലാം ..ഒരു  തീപ്പെട്ടിക്കൊള്ളിയ്ക്ക്  പിന്നിൽ   ആളിക്കത്തി.......ഒരു  ജിന്നാണത്   ചെയ്തതെന്ന്   സമീറയ്ക്ക്   തോന്നി .   ജിന്നിന്   മനുഷ്യമുഖമാണോ ? അവൾ  സംശയിച്ചു..

                    കത്തിയമർന്ന  അക്ഷരങ്ങളിൽ  നോക്കി   സമീറ  പകച്ചു നിന്നു ...ഒരു നിമിഷം ..ഒരേയൊരു  നിമിഷം..അവളുടെ   മനസ്സിൽ ഒരു   ചുഴലിക്കാറ്റ്   രൂപം  കൊണ്ടു .  അതിന്റെ  ഭ്രമണത്തിൽ   അവളൊന്ന്   തിരിഞ്ഞു.  കണ്ണിൽനിന്നൊഴുകിയ   വെള്ളത്തുള്ളികളെ  അവൾ  പകയോടെ   തൂത്തെറിഞ്ഞു .   ചിതറിത്തെറിച്ച   തുള്ളിൽകളിൽ നിന്നും   ആയിരം   സമീറമാർ  ഉയർന്നുപൊങ്ങി .  അവരുടെ   കൈകളിൽ  പേനയോ  പടവാളോ ?  അത്   പടവാൾ തന്നെ.  അവരുടെ   കണ്ണുകളിൽ  കത്തിയെരിയുന്നത്   കാട്ടുതീയോ ?  അതെ..കാട്ടുതീ   തന്നെ..എല്ലാം  ചാരമാക്കാൻ   പോന്ന   കാട്ടുതീ..

"സമീറാ ...."

അത്   അല്ലാഹുവിന്റെ  ശബ്ദം......!

"സമീറാ ......കോപവും   താപവും   മറന്ന്  നീ   ശാന്തയാകൂ.... കത്തിയെരിഞ്ഞത്   വെറും   കടലാസ്സ് ചുരുളുകളാണ് .   അത്   നശ്വരമാണ് .   നീ   നിന്റെ   മനസ്സിലെഴുതൂ...ആത്മാവിലെഴുതൂ....അതാണ്‌  അനശ്വരം.."

"അല്ലാഹുവേ...എങ്കിൽ ഞാനൊന്ന്   കരഞ്ഞോട്ടെ?"

"അരുത്.....നീയറിയണം സമീറാ ,  ഭൂമിയിൽ  നന്മയോടൊപ്പം തിന്മയും  വേണം...ഭൂമിയുടെ   നിലനിൽപ്പിന്  അതാവശ്യം."

എന്നിട്ടും   അല്ലാഹുവിന്റെ   നെഞ്ചിൽ  മുഖമണച്ച്   അവൾ  കരഞ്ഞു....പിന്നെ...മെല്ലെ മെല്ലെ...അവൾ   ശാന്തയായി...ഒരു   നീലത്തടാകം  പോലെ....