ശിവനന്ദ........: നഷ്ടങ്ങളാനെന്റെ ഇഷ്ടം .

2016, ജനുവരി 4, തിങ്കളാഴ്‌ച

നഷ്ടങ്ങളാനെന്റെ ഇഷ്ടം .

പോസ്റ്റ് ചെയ്തത് Sivananda ല്‍ 10:49 PM

നഷ്ടങ്ങളാനെന്റെ ഇഷ്ടം .
---------------------------------------
-- ശിവനന്ദ .

മാനത്ത് നോക്കിയൊരു
മഴവില്ല് കാണുമ്പൊ -
ളമ്മേ മഴവില്ലെ -
ന്നാർത്തു വിളിച്ചുകൊ -
ണ്ടുള്ളിലേയ്ക്കോടുവാനിഷ്ടം ..

മൂവാണ്ടൻ മാവീന്ന്
മാമ്പഴം വീഴുമ്പൊ -
ക്കൊതിയോടെ നോക്കുന്നൊ -
രണ്ണാറക്കണ്ണനെക്കൊഞ്ഞനം കാണിച്ചു
മാങ്ങ പെറുക്കുവാനിഷ്ടം ..

വാനത്തു താഴ്ന്ന്
പറക്കും വിമാനത്തേം
വെള്ളിമേഘങ്ങളേം
വർണ്ണക്കുരുവിയേം
കണ്ടോണ്ടിരിയ്ക്കുവാനിഷ്ടം ..

നീലനിലാവത്ത്
നക്ഷത്രക്കുഞ്ഞുങ്ങ -
ളോടിക്കളിപ്പതും
കാൽതെറ്റി വീണതും
കണ്ടോണ്ടിരിയ്ക്കുവാനിഷ്ടം ...

താഴോട്ടു വീഴുന്ന
നക്ഷത്രക്കുഞ്ഞിനെ
കോരിയെടുക്കാനും
വാരിപ്പിടിയ്ക്കാനും
കൈകൾ വിരിയ്ക്കുവാനിഷ്ടം ...

പാറിപ്പറക്കുന്ന
ചിത്രശലഭത്തെ
മെല്ലെത്തലോടുവാൻ
നെഞ്ചോട്‌ ചേർക്കുവാൻ
പൂവാടി തീർക്കാനുമിഷ്ടം ...

മഴയും മേഘങ്ങളും
പെയ്തങ്ങൊഴിയുമ്പോ -
ളൊളികണ്ണാൽ നോക്കുന്നോ -
രമ്പിളിമാമനേം
ഈറൻ നിലാവിനേമിഷ്ടം ...

മഴയുള്ള രാത്രിയിൽ
ജാലകപ്പാളിയിൽ
മുഖമൊന്നമർത്താനും
മഴതന്റെയാരവം
കേട്ടോണ്ടിരിയ്ക്കാനുമിഷ്ടം ...

മകരപ്പുലരിയിൽ
മഞ്ഞിന്റെ കുളിരിലും
പഞ്ചാക്ഷരീമന്ത്ര -
മുള്ളിൽത്തുളുമ്പുന്ന
ശിവഭക്തയാകാനുമിഷ്ടം ..

പഴുതാരക്കുഞ്ഞിനെ -
യോടിച്ചു തല്ലുന്ന ,
വെള്ളം തട്ടിത്തൂവി
ദേഷ്യം പിടിയ്ക്കുന്ന
കുറുമ്പിക്കുഞ്ഞാവാനുമിഷ്ടം... ...

ദേഷ്യത്തില്‍ മൂക്ക്
വിറപ്പിയ്ക്കുമച്ഛന്റെ
മൂക്കില്‍പ്പിടിച്ചൊന്നു
കൊഞ്ചിച്ചിരിയ്ക്കാനും
വാശി പിടിയ്ക്കാനുമിഷ്ടം...

കനവ് കരിഞ്ഞാലും
കണ്ണ്‍ നനഞ്ഞാലും
കരളിന്‍റെയുള്ളിലെന്‍
കണ്ണീരൊളിപ്പിച്ച്
വെറുതേ ചിരിയ്ക്കുവാനിഷ്ടം ...

കാലപ്പഴക്കത്തില്‍
തൂലിക തേഞ്ഞാലും
കൈവിരല്‍ നൊന്താലും
നെയ്ത്തിരി കത്തിച്ച്
കുത്തിക്കുറിയ്ക്കുവാനിഷ്ടം ...

കടുകോളമാണെന്റെ
യിഷ്ടങ്ങളെന്നാലും
ഇഷ്ടങ്ങളൊക്കെയും
നഷ്ടങ്ങളായപ്പോള്‍
നഷ്ടങ്ങളാണെന്‍റെയിഷ്ടം ....

****************

1 അഭിപ്രായ(ങ്ങള്‍):

Unknown പറഞ്ഞു...: കടുകോളമാണെന്റെ
യിഷ്ടങ്ങളെന്നാലും
ഇഷ്ടങ്ങളൊക്കെയും
നഷ്ടങ്ങളായപ്പോള്‍
നഷ്ടങ്ങളാണെന്‍റെയിഷ്ടം ....

നഷ്ടപ്പെട്ടു എന്ന് കരുതിയതൊകെ തിരിച്ചു കിട്ടുമ്പോള്‍ ഇഷ്ടങ്ങളാണ് എന്റെ സന്തോഷം എന്ന് കരുതാമല്ലോ ............; 2016, ജനുവരി 16 9:21 PM

ഒരു അഭിപ്രായം പോസ്റ്റ് ചെയ്യൂ

എന്നെപ്പറ്റി ..

ഈറൻ നിലാവിൻറെ സ്വപ്നം പകുത്ത വെറുമൊരു സാധാരണക്കാരി . എറണാകുളം ജില്ലയിലെ മനോഹരമായൊരു കൊച്ചു ഗ്രാമത്തിൽ , ഒരുപാട് അക്ഷരക്കൂട്ടങ്ങളുടെ നടുവിൽ ജനിച്ച് ,എന്നും വാഗ്ദേവതയെ ധ്യാനിച്ച് വളർന്ന് , കലയുടേയും സാഹിത്യത്തിൻറെയും

ചിറകിലേറിപ്പറന്ന്... ഞാൻ ജീവിതത്തിൻറെ ഏറ്റവും നല്ല നാളുകളിലൂടെ...

അക്ഷരങ്ങളോടൊപ്പം സംഗീതവും നൃത്തവും എൻറെ ജീവിതത്തിൽ നിറമാല ചാർത്തി . ഗസലുകൾ തേന്മഴയായി മനസ്സിൽ പെയ്തലിയുമ്പോൾ....ഓഷോയുടെ വാക്കുകൾ അത്ഭുതമായി പെയ്തു നിറയുമ്പോൾ ...ബുദ്ധവചനങ്ങളിൽ ഞാനൊരു ധ്യാനത്തിലേയ്ക്ക്..സ്വാതന്ത്ര്യസമരസേനാനികളുടെ കുടുംബത്തിൽ പിറന്നത് കൊണ്ടോ വിപ്ലവ കഥകൾ കേട്ട് വളർന്നത് കൊണ്ടോ എന്തോ എൻറെ ഞരമ്പുകളിൽ രക്തത്തോടൊപ്പം ഒരു ചെറു കനലും ഒഴുകി നടന്നു. അച്ഛൻറെ ശൌര്യവും , അമ്മയുടെ സ്നേഹവും എന്നിൽ പുനർജ്ജനിച്ചത് കൊണ്ടാവാം , മനസ്സിലും വാക്കുകൾക്കുള്ളിലും , എരിയുന്നൊരു കനലും , തഴുകാനൊരു തൂവലും സൂക്ഷിച്ചു ഞാനെപ്പോഴും.. സാഹചര്യങ്ങൾ എന്നുമെന്നെ ശത്രുവായി പ്രഖ്യാപിച്ചു. പക്ഷെ പ്രകൃതി എനിയ്ക്ക് വേണ്ടി സാഹചര്യങ്ങളോട് എന്നും പൊരുതിക്കൊണ്ടേയിരുന്നു. കുട്ടിക്കാലം മുതൽ ഞാൻ അനുഭവിച്ചറിഞ്ഞ കളങ്കമില്ലാത്ത സൗഹൃദങ്ങൾ , ഗ്രാമീണശാന്തി , പിന്നീട് കാലം വരുത്തിവച്ച അശാന്തികൾ....ഇതെല്ലാം എൻറെ കഥാമനസ്സിന് അസംസ്കൃത വസ്തുക്കളായി . ഭാഷയോ ശൈലിയോ കൃത്രിമ ഗൗരവമോ ഞാൻ കടമെടുത്തില്ല. ഒരേസമയം എൻറെ ചിന്തകളിൽ വന്ന ലാളിത്യവും മൂർച്ചയും സത്യസന്ധമായി ഞാനെൻറെ കഥകളിലും പകർത്തി . കഥകളിലൂടെ ഞാൻ തീർത്ത സമാന്തര ലോകം എന്നെ കൈ പിടിച്ചുയർത്തുക തന്നെ ചെയ്തു.

സമൂഹത്തിന് നേരെ കണ്ണാടി പിടിച്ച് തന്ന് എന്നെ വളർത്തിയ എൻറെ അച്ഛനും അമ്മയ്ക്കും , പിന്നെ എന്നെ സ്നേഹിയ്ക്കുന്നവർക്കും വേണ്ടി ഈ അക്ഷരപ്പൊട്ടുകൾ..........വായനാശൈശവത്തിൻറെ തീർത്താൽ തീരാത്ത ബാലാരിഷ്ടതകളിൽപ്പെട്ട് നട്ടം തിരിയുന്ന ഈ അക്ഷരപ്പൊട്ടുകൾ സ്നേഹത്തോടെ ഞാൻ സമർപ്പിയ്ക്കുന്നു .

.

2016, ജനുവരി 4, തിങ്കളാഴ്‌ച

നഷ്ടങ്ങളാനെന്റെ ഇഷ്ടം .

1 അഭിപ്രായ(ങ്ങള്‍):

ഒരു അഭിപ്രായം പോസ്റ്റ് ചെയ്യൂ

എന്നെപ്പറ്റി ..

പിന്‍ തുടരുന്നവര്‍...

കൂടുതല്‍ വായിക്കാന്‍.....

നന്ദി: