ശിശുദിനം .

                                              ശിശുദിനം .
                                              -----------------
                                                                       --  ശിവനന്ദ.

നാളെ  ശിശുദിനം ......

ആഘോഷിയ്ക്കാം  നമുക്ക്-

വേണമെങ്കില്‍  രണ്ടു കുപ്പിയും  പൊട്ടിയ്ക്കാം..

മണല്‍പ്പുറത്ത്  ജീവനറ്റ് കമഴ്ന്ന

കുരുന്ന്‍ ബാല്യത്തെ   മറക്കാം..

                       നാല് കിണ്ണം   ബിരിയാണി   വാങ്ങി 

                        രണ്ടു കിണ്ണം  തിന്ന്‍,  ബാക്കി  രണ്ട്

                        ചിക്കിച്ചികഞ്ഞ് ചവച്ചു തുപ്പി 

                        കുപ്പയിലെറിയാമതാരെങ്കിലും  തിന്നോളും...

തെരുവുനായ്ക്കളോടൊപ്പം  കുപ്പയില്‍ 

തപ്പിത്തിരഞ്ഞു വാരിത്തിന്നുന്ന -( ഹോ !)

ആദിവാസിബാല്യങ്ങളേയും 

മറന്നിട്ടൊരു  റിപ്പോര്‍ട്ട്  തേടാം .... ( അത് മതി.  ധാരാളം ! )

                      മലപ്പുറത്ത്  പോയൊന്ന്  നോക്കി 

                      അക്ഷയപാത്രം   കണ്ടു മടങ്ങി 

                        മനസ്സിലത്  വെറുതെയൊന്നുരുവിട്ട്

                        നമുക്ക്  നമ്മുടെ   കാര്യം   നോക്കാം..( അല്ലാതെ പിന്നെ...?)


( എല്ലാവരും ക്ഷമിയ്ക്കുക എന്നോട്. ഈ ശിശുദിനത്തില്‍ ആശംസ നേരാന്‍ കഴിയുന്നില്ല .)